حائر في دنيا الله

 تنبيه

احترس.. الذاكرة ترجع للخلف…فكل واحد يحاسب يكش ويرجع عيل….

يبدو أن فيض الذكريات الذي فتحته في الموضوع السابق ما زال يجري ويتدفق، فأنا من جيل أو بمعنى أدق (بالنسبة لي شخصيا) من دفعة الريس أي مواليد 81، الدفعة التي جاءت وجاء معها الخير كله، وأعتقد أن مواليد الثمانينيات هم من أواخر أطفال عاشوا طفولة بريئة، فبصراحة وبدون مواربة بعض الكبار الآن أكثر براءة من أطفال هذا الوقت…
المهم وبدون تفلسف وتعقيدات اجتماعية فأنا لسه فاكر أشياء كثيرة جداً جدا………..، ما زلت أتذكر التلفزيون ومسلسل برج الحظ ونادية فهمي التي تصرخ شرارة شرارة شرارة شرارة…. وهذا المسلسل رسخ في طفولتنا عقدة الشخص النحس التي كنا نلصقها في أي شخص يصادف وجوده حدوث شيء سيء… ومن هناك أيضاً مسلسل عيون وشخصية حيرم المحامي تحت التمرين، وهناك مسلسل مطلوب عروسة وأحمد بدير والأغنية المشهورة مطلوب عروسة عينيها خضرة وشعرها أصفر والباقي مش فاكره،،،، وطبعا لا أجرؤ أن أنسى الثنائي بكيزة زغلول…
طيب فاكرين أنا البرادعي يا رشدي، التيمة المشهورة في مسلسل وتوالت الأحداث عاصفة، طيب فاكرين مسلسل الراية البيضا… ولا يا حمو تمساحة يالا.. في التمساحة الموزة راكبة ومرتاحة قلتلها خديني جنبك قالتلي مفيش مساحة، وكنت أول مرة أعرف أنه ينفع يكون هناك نهاية مفتوحة في المسلسلات، طيب فاكرين بابا عبده وكمان الأبنائي الأعزاء شكراً،ومن ينسى حسن أرابيسك، والمال والبنون، وضمير أبلة حكمت ويوم القبض على فاطمة والموسيقى الرائعة لعمر خيرت…..
طيب فاكرين زووووبة وحلوة يا زوبة طعمة يا زوبة اللي شافوكي قالوا أروبة، محمود ياسين وسميرة أحمد في مسلسل غدا تتفتح الزهور، وطبعا الأستاذ محمود مرسي في الرجل والحصان، ونهاية العالم ليس غدا، وأيضاً ميزو سمير غانم وبلحة وهي إسعاد يونس، نفسية وهي فردوس عبدالحميد، والتي قامت أيضاً بمسلسل وما زال النيل يجري، وبالمرة طبعا هناك مسلسل فرصة العمر لمحمد صبحي، وبمناسبة محمد صبحي لا أنسى سنبل، وخاصة انه كان من أجا، تحديدا “سنبل شحاتة مرزوق سنيطة مركز اجا دقهيلة” وبمناسبة الضحك، فاكرين البخيل وأنا، وكمان “ظريفة؟ آثار الحكيم في ترويض الشرسة…
طيب فاكرين مسلسل أهالينا، وطبعا مسلسل العائلة وفاكر من اللي غنته أنغام (نِديكي حب وتِدينا
ونمد للشمس ايدينا ولو تعبنا تاخدينا ناخد في حضنك تعسيلة)،، طيب فاكرين القاهرة والناس، طيب فاكرين أحلام الفتى الطائر، الوسية، زينب والعرش، الأيام، نصف ربيع الآخر ومفهمتمش معنى العنوان غير بعد كم حلقة..، وبالمرة لا بتاع يحيى الفخراني، طيب فاكرين أحمد بدير وهوا عبيط وبيجري وبيقول هراس جاي هراس جاي….
ولأني حاسس أن التلفزيون موضوعه كبير زي ما بوظ دماغنا هعمل زيه وهقول المسلسلات الدينية في آخر السهرة، فاكرين عمر بن عبد العزيز، وعصر الأئمة، هارون الرشيد وطبعا محمد رسول الله…
طيب فاكرين مسلسلات الجاسوسية…. طبعا محدش يقدر ينسى رأفت علي سليمان الهجان أو كوفي كوهين أو ديفيد شارل سمحون أو بنيامين حنانيا…….. وطبعا فيه جمعة الشوان ودموع في عيون وقحة،، والحفار والسقوط في بئر سبع….
نخرج من المسلسلات لأني فعلا لسه فاكر كتير وحاسس أن البلد دي لم تكن تفعل شيء غير التمثيل والتمثيليات، أفكركم بأسبوع السهرات على التلفزيون، فاكرين يوم السبت نادي السينما، والأحد حدث بالفعل أما الاثنين تاكسي السهرة والثلاثاء بانوراما فرنسية والأربع اخترنا لك ودايما فيه مجايفر، والخميس أوسكار، أما أغبي ما في سهرات التلفزيون برنامج أحداث 24ساعة الذي كان يقطع أحداث الفيلم أو المسرحية ويدخلنا عالم النوم فورا لأن أحداث سيادة الرئيس ووزراءه كانت طويلة جداً…
طيب فاكرين يوم الجمعة برنامج أنباء وآراء والصغنون معتز الدمرداش وهوا لسه ورور، وكابتن علاء صادق لما والتحليل الكروي الشامل في آخر البرنامج،، وفاكرين نهاية الأسبوع مع الله يرحمه أحمد سمير…
طيب فاكرين برنامج خلف الأسوار، وفكر ثواني واكسب دقايق، وفاكرين عالم جيليت الرياضي، بانوراما عالمية، والأستاذ مصطفى محمود وبرنامج العلم والإيمان والموسيقى الجميلة بتاعته… مواقف وطرائف يسري غرابة وجلال علام هلف وأدور وآجي وأجيب أحلى المواقف والطرائف والعجايب استنونا كل خميس…….
…
طيب فاكرين الإعلانات القديمة… فاكرين أميجو،، لابس أميجو بينو ونا عليها بدور…فاكرين إعلان البلهارسيا.. طول ما بتدو ضهركم للترعة.. عمر البلهارسيا في جتتكم ما ترعى… فاكرين لبان سمارة…فاكرين إعلانات الإيدز.. عمري ما فهتمها…. طيب فاكرين تخلص من حمامك القديم جيرافينا….. فاكرين الكوكاكولا كانت بكام،، انا شفتها بخماشر قرش ومن ثم ريال وبعدين ربع جنيه وبعدين تلاتين وبعدين أربعين قرش.. ثم زادت لنص جنيه.. وبعدين قفزت لخمس وسبعين قرش وحاليا بواحد جنيه مصري من اللي ملوش لازمة… فاكرين بسكويت رشا أنا عايز رشا….. فاكرين شاي البراد الأزرق وشاي الشيخ الشريب… فاكرين لانشون مصر والسودان ولانشون امجاد فاكرين لبان هارتي.. يا حبيب هارتي….

…
طيب فاكرين أغاني شباب زمان،، اللي بقوا عواجيز دلوقتي عمرو دياب أول ما طلع ولا منير ولا علي الحجار ولا هاني شاكر… طيب فاكرين الفرق الكتير اللي ظهرت زي الفور إم بتاع مستر عزت، فاكرين فرقة المصريين لما قالوا متزعلوش يا بنات لو قلنا بصراحة أن الجواز عمره ماكان راحة، وكمان قالوا الشوارع حواديت.. حوداية الحب وحوداية عفاريت.. اسمعي يا حلوة لما اضحكك…،، فاكرين فرقة الأصدقاء لما قالت وحنا فايتين ع الحدود…مستمرين في الصعود…اختفى النيل الجميل من تحتنا…والمدن والريف وأول عمرنا…وابتدا شيء ينجرح جوا الوجود… وابتدينا أسئلة ملهاش ردود….ملنا ع الشباك نخبي دمعة فرت مننا…. فاكرين منير لما قال بالحظ والصدف….. فاكرين حنان لما قالت اضحك بقا وافرجها يعم…خلي الدنيا معاك تحلو… فاكرين فاطمة العيد وأغانيها الشعبية الجميلة….

….
طيب فاكرين الكليبات… طبعا كليبات زمان غير كليبات دلوقتي خالص… فاكرين غنية مدحت صالح وشريف منير المليونيرات ……وأنا ويايا بعيش عيشة المليونيرات وأحلم وأنا معيش ملعنش الأزمات…. طيب فاكرين محمد ثروت وهاني شاكر، باااالدي يا بلدي إن كان ع القلب مفيش غيرك….. وان كان ع الحب مفيش غيرك….ده جناحى مرفرف فى سماكى…..والقلب اتربى على خيرك….بلدى بلدي يابلدى….بلدى بلدي يابلدى….
…..

طيب فاكرين عروستي بتاع ماما سامية واللي ميعرفش يقول عروستي عشان الفزورة تبقى أسهل.. عروستي…، فاكرين صباح الخير وبعدها جابوا مساء الخير لماما نجوي وكابتن بقلظ والسعيد صاحبي فكرني أنه كان نفسه اسمه يطلع في لوحة الشرف مع ماما نجوى،، طيب فاكرين ماما سامية والسندباد، ماما سامية حسين، ما يطلبه الأطفال، بابا ماجد والعم بيتر، وفاكرين عمو فؤاد وأغنيته عمو فؤاد راجع يا ولاد… سبنا زعلنا…. وحنا سألنا…. قالوا دا شاور عقله وعاد….
….
فاكرين أغاني الأطفال زمان، محمد ثروت عفاف راضي ولبلبة ونيلي وصفاء أبو السعود وغيرهم، فاكرين عبد المنعم مدبولي وهوا بيقول كان فيه واد اسمه الشاطر عمر وكمان فيه جدو بشنبات… في ميعاد الأكل بأمر سي عمر جدو يقعد يحكي حكايات…. طيب فاكرين الدنيا برد الدنيا برد وعم خليل بيسقي الورد،، الدنيا برد يا عم خليل وبتسقي الورد يا عم خليل…. ودي على كمان غناها أحمد منيب….
أقولكم إيه ولا إيه، طيب فاكرين الجميل محمد ثروت له كبشة أغاني جميلة جداً، منها على ما أتذكر طيور النورس وفاكرين له أيضا منى ورشا……
….
طيب فاكرين صفاء أبو السعود وهيا بتقول ياللا نقضي أجازة سعيدة ونشوف حاجة جديدة مفيدة،، ياللا ياللا نقضي أجازة سعيدة………طيب فاكرين أهلا أهلا بالعيد مرحب مرحب بالعيد هيه هيه هيههههههههه….. وفاكرين صفاء آه منك يا صابونة يا مجنونة بتقلي وتقلي لما هتبقي مللي …. وفاكرين بصوا وشوفوا الحصالة بتتقل ليه ياللي يحوش من مصروفه زي ما يبقى برافو عليه… وبمناسبة الحصالة فاكرين لبلبة لما قالت حصالتي ليها كرش يتحط فيه القرش ويقول ما تتكسرش هفضل طول عمري قرش.. وأحط تاني قرش وقرش على قرش وأنساه ومفتكرش.. دا كبر ولا مكبرش.. دا كبر ولا مكبرش….

طيب فاكرين اسمع كلام أمك متسمعش كلام أبوك.. متسمعش كلام ستك أم أبوك،،،، وفاكرين أنا عندي بغبغان غلباوي بنص لسان… طيب فاكرين دي إهئ أهئ أهئ فيه إيه يا سونة.. البالونة يابابا، سونة أمورتي يا حلوة جري إيه ليه زعلانة… اعمل إيه قوللي يا بابا اتفرقعت البالونة…. ويجرى إيه لما يفرقع… الدنيا فيا هتولع….
طيب فاكرين أغانينا إحنا، او  بمعنى أغاني البنات، الصبيان كانوا يلعبوا ضرب وجري،،، كانوا يقولوا
 بابا جاي متى
جاي الساعة ستة
راكب ولا ماشي
راكب بسكلته
بيضة ولا حمرة
بيضة زي القشطة
وسعوا له السكة
واضربوا له سلام
والعساكر وراه

والضباط قدام
 

 

 

…
بصراحة أنا مش فاكر الأغاني دي كلها، لأني عمري ما غنتها،، بس طبعا استحالة أنسى أغاني نيلي وخاصة عندي فراشة صغننة….
فاكرين سعاد حسني لما قالت البنات البنات ألطف الكائنات غنوا يا تلميذات…. وفاكرين كنا نقول إيه للبنات لما نحب نضايقهم ردا على الاغنية دي… اللي فاكر يقول في سره أنا مليش دعوة…. وفاكرين كمان لتجيبلي شيكولاتة لا بلاش يا ولا… روح رجع بطاطا لا بلاش يا ولا….
طيب فاكرين المسلسلات الأجنبية،، انا ذاكرتي ضعيفة في الأجنبي ولكن لسه فاكر ومش قادر أنساها الآنسة أوشين… وكمان ريدج في الجرئ والجميلات لما كان ييجي بعد نشرة تسعة وكان مرة يقعد نص ساعة ومرة خمس دقايق ومكنتش أعرف سبب تغير طول الحلقات ولكن لما كبرت سألت وعرفت إن فيه حاجات بتتقطع.. ما علينا ما علينا… طيب فاكرين الرجل الأخضر، والكلبة لاسي، طيب فاكرين مسرح العرائس والضفدع كرميت كانت لذيذة أوي الحلقات دي….
وبمناسبة الأجنبي فاكرين الأغنية اللي الأطفال يقلدو أصوات الحيوانات عرفت مؤخرا إنها أغنية طلياني واسمها Nella Vecchia Fattoria دا بالايطالي…
….
أنا طولت صح… شكلي طولت،،، آخر حاجة هقولها عشان أصلا أنا تعبت مش من الكتابة لا من كثرة الشجن…. أنا خلاص مش هقول أسماء أغاني ولا برامج لأني اكتشفت إن الموضوع كبير جدا، ومحتاج قعدة خاصة…. بس بجد بجد محدش ينسى محمود بكر لما قال… ونزلت عدالة السماء على ستاد باليرمو…….

 إهداء
إلي كل ذكرى… إلي كل من كتمت أنفاسي بالذهول و الدهشة…. أعتذرك….